【十三短打】美斯真系变咗张家辉？

【Now Sports】好多好多年前，已经听人话美斯似张学友，亦似张家辉。呢阵子更听见人话，美斯连演技都似埋张家辉，球王变影帝。美斯（Lionel Messi）落实入「门」，前一日仲喺告别巴塞隆拿嘅记者会上七情上面、声泪俱下，一日後身在巴黎笑容满面，悲喜反差令网民觉得之前嘅系演技。人人都有唔同意见，话佢感情唔系真，而系影帝张家辉上身，为嘅系唔想俾人话只向钱看，或者日後有机会倒戈（PSG同巴塞喺欧联系几有缘㗎），都会得到善待，系自我保护行为。

唔好咁啦，第二个唔敢讲，十三觉得以美斯嘅江湖地位，使鬼做戏。

美斯近期已经唔止一次展现真性情，讲嘅系上个月美洲国家盃称霸，终止国际赛锦标荒後，又唱又跳，然後玩碎步转身捧盃。真情流露，几时见过佢咁畅快？

对巴塞前前後後嘅廿载情，真的假不了，俾你读一条龙学校十年八载，都唔会话对母校冇感情，何妨，呢间球会为美斯赢得一切，佢喺记者会嘅眼泪，假唔到。如果真系好戏到咁，随时劲过张家辉。

再讲，大家只系想睇好波，戏真定情真，重要咩？

撰文：球十三
足球迷叫第十二人，冇偏爱，冷眼旁观系十三。
email：ballthirteen@hotmail.com
欢迎浏览球十三fb专页，若得到波友一个like，就是我们团队的一大鼓舞：
www.facebook.com/ballthirteen